Me kan tilby

Me ønskjer at våre tilsette skal få moglegheit til å kontinuerleg utvikla seg. Difor kan alle faste tilsette hos oss søkja om utdanningsmidlar for å ta vidareutdanning. Me har romlege budsjett og låg terskel for å gje deg støtte, så lenge det er kompetanse me treng. Det betyr at om du vil utvikla deg i ein retning, og me deler draumen din - er me gjerne med og støttar deg på vegen, også økonomisk. 

Den viktigaste utviklinga og kunnskapsoverføringa skjer i kvardagen på arbeidsplassen din. Difor er det viktig for oss at det er strukturerte formar for internundervisning. Alle einingane våre skal ha eigne kompetanseplanar, kor det vil vere ulike formar for undervisning internt - slik at du heile tida kan utvikla deg og få støtte i eige arbeid. 

Me treng kompetanse no og i framtida. Difor gir me støtte til grunnutdanning både til våre tilsette, og til personar som ønskjer å jobba hos oss når dei er ferdig utdanna. Dette er noko me er stolte av å bidra med, og som me også vil halde fram med i framtida for å rekruttera den kompetansen me treng. 

Kven kan søkja?

Både du som er tilsett hos oss i dag og du som ønskjer å arbeida for kommunen i framtida kan søkja om støtta. Det vil seie at det opent for alle å søkja.  

Kven får støtte?

Me tar ein individuell vurdering for kvar søknad som kjem inn. I behandlinga gjer me ein samla vurdering basert på blant anna kommunen sine satsingsområde, tilgjengelege midlar og behovet for kompetanse. Det vil og bli gjort vurdering om me krev bindingstid i kommunen etter utdanninga, dette er basert på kor mykje støtte Suldal kommune gjer i kvar enkelt sak.  

Korleis søkja?

Du som allereie er tilsett i Suldal kommune kan senda ein søknad via dette skjemaet

Du som ikkje er tilsett i Suldal kommune kan ta kontakt med organisasjonsrådgjevar Gorm Hol på e-post 

Søknadsfristar

Du må søkja før du startar på studiet, men du treng ikkje vite at du har fått plass når du søkjer. 

Me har frist 4 gonger i året:

• 1. mars
• 1. juni
• 1. september
• 1. desember

Tidlegare har me gitt støtte til desse utdanningane: 

• Bachelor i sjukepleie (samarbeid med HVL)
• Master i musikkterapi
• Master i fysioterapi
• Barnehagelærar (ABLU)

Kvart år kjem studentar til kommunen for å kombinera sommar i Suldal med arbeid hos oss. Dette er arbeidskraft me treng for å gje gode og solide tenester for innbyggarane våre.

For at det skal bli litt meir attraktivt å arbeida som sommarvikar eller helgevikar i Suldal kommune, tilbyr me 10 000 kroner i stipend for studentar innan sjukepleie, barnehagelærar og medisin. Om det berre er 1 år igjen av studiet, tilbyr me 25 000 kroner i året. 

Sjekk under for å sjå om du kan få søkje om stipend, og kor mykje stipend du kan forvente å få av oss. 

I samarbeid med Høgskulen på Vestlandet og Statsforvaltaren støttar me studentar som ønskjer å bli barnehagelærarar. I denne ordninga kombinerer du studier med praksis i ein barnehage over ein periode på 4 år. Etter utdanninga er du garantert arbeid hos oss, i 100% stilling. 

Framtidas generasjonar er viktig for oss. Me ønskjer at elevane i Suldalsskulen skal få eit godt fagleg og sosialt opplæringsløp med høg kvalitet. Difor treng me fagleg oppdaterte lærarar. Lærarane våre har høve til å ta vidareutdanning gjennom Kompetanse for kvalitet, som er ei satsing frå Utdanningsdirektoratet. Her får Suldal kommune dekka ein viss del av utgiftene, resten dekkjer me sjølv.

Skulane og barnehagane våre er del av desentralisert kompetanseutvikling, i samarbeid med Høgskulen på Vestlandet (HVL). Det betyr at tilsette i skule og barnehage kan få rettleiing og hjelp av HVL til å vidareutvikla kompetansen sin.